Sunday, August 14, 2011

ഓരോ ദേശസ്നേഹിക്കും എന്റെ സ്വാതന്ത്യ ദിനാശംസകള്‍



ഭഗത് സിംഗിനേയും, സുഭാഷ് ചന്ദ്ര ബോസിനേയും പോലെ അറിയപ്പെട്ടതും അറിയപ്പെടാത്തവരുമായ അനേകം ധീര ദേശാഭിമാനികള്‍ ജീവന്‍ നല്‍കി സ്വാതന്ത്യം നേടിത്തന്ന ഭാരതം. കോര്‍പ്പറേറ്റുകളും കോര്‍പ്പറേറ്റ് ദല്ലാളന്മാരും നിശ്ചയിക്കുന്നവര്‍ കമ്മീഷന്‍ പറ്റിക്കൊണ്ട് നടത്തുന്ന ഭരണക്രമല്ലായിരുന്നു അവര്‍ സ്വപ്നം കണ്ടത്. ഓരോ സി.ഐ.ജി റിപ്പോര്‍ട്ടുകള്‍ക്കും പറയുവാനുള്ളത് ആഴവും പരപ്പും അളക്കുവാനാകാത്തവിധം പെരുകിക്കൊണ്ടിരിക്കുന്ന അഴിമതിയുടെ കഥകള്‍ മാത്രം.

അഴിമതി അവസാനിപ്പിക്കണമെന്നും അഴിമതിക്കാര്‍ ശിക്ഷിക്കപ്പെടണമെന്നും ആവശ്യപ്പെടുന്ന ജനതയ്ക് നേരെ നോക്കി കൊഞ്ഞനം കുത്തിക്കൊണ്ട് സ്വാതന്ത്രത്തെ പറ്റിയും ജനാധിപത്യത്തെ പറ്റിയും ലജ്ജയില്ലാത്ത വാക്കുകള്‍ ഇനിയും സംസാരിച്ചുകൊണ്ടിരിക്കും. കോടിക്കണക്കിനു പട്ടിണിക്കാര്‍ ഇന്ത്യന്‍ ഗ്രാമങ്ങളിലും നഗരങ്ങളിലെ അഴുക്കു ചാലുകളിലും പുഴുക്കളെ പോലെ ചത്തൊടുങ്ങുമ്പോള്‍ കോടികള്‍ കൊള്ളയടിച്ചവരെ സംരക്ഷിക്കുവാന്‍ വ്യഗ്രത കാണിക്കുന്ന, അഴിമതിക്കെതിരെ കാര്യക്ഷമമായ നിയമങ്ങള്‍ കൊണ്ടു വരണമെന്ന് പൊതു ജനം ആവശ്യപ്പെടുമ്പോള്‍ അത് ജനാധിപത്യത്തിനു “നല്ലതല്ലെന്ന്” പറയുന്നവരാണോ നമ്മളെ ഭരിക്കേണ്ടത്? ഭീകരന്മാര്‍ക്ക് അഴിഞ്ഞാടുവാന്‍ അവസരമൊരുക്കിയും അമേരിക്കക്ക് കപ്പം കൊടുത്തും അഴിമതിക്ക് കീ ജെയ് വിളിച്ചും അടിമകളായി ജീവിക്കുവാനുള്ളവനല്ല ഭാരതീയന്‍ എന്ന് ഉറക്കെ പറഞ്ഞ് ആത്മാഭിമാനത്തോടെ തലയുയര്‍ത്തി നില്‍ക്കുന്ന ഒരു തലമുറ ഉയര്‍ന്നു വരട്ടെ. അഴിമതിക്കും എന്റോസള്‍ഫാനും എതിരായ ജനകീയ പോരാട്ടങ്ങള്‍ക്ക് എല്ലാ വിധ പിന്തുണയും പ്രഖ്യാപിച്ചു കൊണ്ട്. ഇന്ത്യയെ സ്നേഹിക്കുന്ന എല്ലാ ഇന്ത്യക്കാര്‍ക്കും സ്വാതന്ത്യ ദിനാശംസാക്കള്‍.

2 comments:

കുരുത്തം കെട്ടവന്‍ said...

സ്വാതന്ത്ര്യം ദിനാശംസ നേരുബ്ബോള്‍ പോലും ഇന്ത്യക്ക്‌ സ്വാതന്ത്ര്യം നേടി തന്ന മഹാത്മാ ഗാന്ധി എന്ന അര്‍ധ നഗ്നനായ ഫക്കീറിനെ ഒന്ന് ഒാര്‍ക്കാനോ സ്മരിക്കാനോ പോലും മെനക്കെടാത്ത ഇത്തരക്കാരാണു ഇന്ത്യയുടെ ശാപം. എന്നിട്ടോ അവരെത്രെ ദേശാഭിമാനത്തെ കുറിച്ച്‌ ഗീര്‍വാണങ്ങള്‍ എഴുതിവിടുന്നവര്‍.

ശിഹാബ്മദാരി said...

വേണ്ടത് തന്നെ ... പക്ഷെ നാം എന്ത് ചെയ്യുന്നു അന്നത് വലിയ ചോദ്യമാണല്ലോ എന്നും ... ആശംസകൾ